مرز تاجیکستان به روی تاجران افغانستان بسته شد

15:46:39 - 1396/09/30
b

تهران/ خبرفوری/ مسئولان در اتاق تجارت و صنایع افغانستان می‌گویند که مرز کشور تاجیکستان به روی افغانستان از پنج روز به این سو بسته شده است.

خان جان الکوزی معاون اتاق تجارت و صنایع افغانستان به رسانه‌ها گفته است که کشور تاجیکستان مرز کشورش را به روی افغانستان در منطقه آی خانم ولایت(استان) تخار و شیرخان بندر در ولایت قندوز مسدود کرده است.

آقای الکوزی بیان داشته که پس از درگیری میان قاچاقچیانی که گفته می‌شود از افغانستان وارد تاجیکستان شده بودند با نیروهای امنیتی آن کشور، چند پلیس مرزی تاجیک کشته و زخمی شدند و به دنبال این رویداد مرز این کشور به روی افغانستان بسته شده است.

معاون اتاق تجارت و صنایع گفت که مرز افغانستان به روی بازرگانان و رفت و آمد به روی تاجیکستان باز است اما مرز آن کشور به روی افغانستان بسته است.

وی از حکومت افغانستان خواسته از راه‌های دیپلماتیک برای بازگشایی این مرز بکوشد زیرا اموال تجارتی بازرگانان افغان در مرز متوقف شدند.

به گفته آقای الکوزی، در چند روز گذشته دست‌کم ۵۰۰ هزار دلار به بازرگانان افغان خسارت وارد شده است.

آقای الکوزی افزود: "خودمان هم با مقامات تاجیکستان گفت‌وگو کردیم از دولت هم خواستیم که مشکل را حل کنند اگر نشود باید اجناس تاجیکی را هم متوقف کنند و اجازه ندهند چون ما به ضرر هستیم و آنها به مفاد."

اگرچه شماری از رسانه‌های تاجیکستان نیز به نقل از مقاماتی خبر مسدود شدن مرزهای آن کشور با افغانستان را پس از درگیری مرزی منتشر کردند اما مقامات تاجیکستان این خبر را رسما تایید نمی‌کنند.

محمد اُلُغ خاجه‌یف، سخنگوی نیروهای مرزبانی کمیته دولتی امنیت ملی تاجیکستان خبر بسته شدن مرز با افغانستان را رد کرده است.

وی گفته است که همه پل‌ها و گذرگاه شیرخان بندر طبق نطام قبلی باز است و فعالیت دارد.

در درگیری مرزی که در منطقه مرزی شوراآباد تاجیکستان به تاریخ دوم دسامبر رخ داده بود، خیر‌الدین احتمف، فرمانده یک واحد مرزبانی آن کشور کشته و چهار مرزبان دیگر زخمی شدند. حکومت تاجیکستان از افغانستان خواسته که قضیه کشته شدن فرمانده تاجیک را "پیگیری و جنایتکاران را دستگیر کند."

ولایت های بدخشان، تخار و قندوز در شمال افغانستان با تاجیکستان مرز مشترک دارند.


افغانستان و تاجیکستان حدود ۱۳۰۰ کیلومتر مرز مشترک دارند و این مرز یکی از مهمترین مسیرهای قاچاق مواد مخدر از افغانستان به روسیه و کشورهای غربی به شمار می‌رود.

تعداد نظرات : 0

ارسال نظر

شبکه های اجتماعی